1810 ರಲ್ಲಿ (MEP) ಗುರುಗಳು ಬೇಗೂರು ಗ್ರಾಮಸ್ಥರ ಸಹಾದಿಂದ ತೆಂಗಿನ ಗರಿಗಳಿಂದ ಸಣ್ಣ ಗುಡಿಸಲನ್ನು ನಿರ್ಮಿಸಿ, ಅದನ್ನು ದೇವಾಲಯವಾಗಿ ಮಾರ್ಪಡಿಸಿದರು.  ಇದುವೇ ಬೇಗೂರಿನ ಕ್ರೈಸ್ತರಿಗೆ ಮೊದಲನೇಯ ದೇವಾಲಯವಾಯಿತು.  ಈ ಮೊದಲ ದೇವಾಲಯವನ್ನು ಸಂತ ಫ್ರಾನ್ಸಿಸ್‌ ಕ್ಸೇವಿಯರ್‌ ರವರಿಗೆ ಸಮರ್ಪಿಸಲಾಯಿತು.  ಫಾ|| ಜೆರ್ರಿಗೆ ರವರು ಜನರ ಆಧ್ಯಾತ್ಮಿಕ ಅಗತ್ಯಗಳನ್ನು ಪೂರೈಸುವ ಮತ್ತು ಧಾರ್ಮಿಕ ಸಂಸ್ಕಾರಗಳನ್ನು ನೀಡುವ ಜವಾಬ್ದಾರಿ ವಹಿಸಿಕೊಂಡರು.  1847 ರಲ್ಲಿ ಫಾ|| ಜೆರ್ರಿಗೆ ರವರೇ  ಬೇಗೂರಿನ ಪ್ರಪ್ರಥಮ ವಿಚಾರಣೆ ಗುರುಗಳಾಗಿ ಅಧಿಕಾರ ವಹಿಸಿಕೊಂಡರು.  ಇವರ ನಂತರ ಹಲವಾರು ಗುರುಗಳು ಬೇಗೂರಿನ ವಿಚಾರಣೆ ಗುರುಗಳಾಗಿ  ಅಧಿಕಾರ ವಹಿಸಿಕೊಂಡರು.  ಅವರಲ್ಲಿ ಫಾ|| ಮೊಂಟಂಡ್ರಾಡ್‌ ಮತ್ತು ಫಾ|| ರೆನೌಡಿನ್‌ (1863), ಫಾ|| ಬೊಕೆ (1868), ಫಾ|| ಜಾಕೆನೀರ್‌ (1888), ಫಾ|| ಯುಯರ್ನ್ಯೂ (1890), ಫಾ|| ರೌಸ್‌ (1895), ಫಾ|| ಫೈಸಾಂಡಿಯರ್‌ (1906), ಫಾ|| ಕ್ಯಾಪೆಲ್ಲೆ (1932).  ಫಾ|| ಕ್ಯಾಪೆಲ್ಲೆರವರ ನಂತರ ಸ್ಥಳೀಯ ಗುರುಗಳು ಬೇಗೂರು ವಿಚಾರಣೆಯ ಅಧಿಕಾರ ವಹಿಸಿಕೊಂಡು ಧಾರ್ಮೀಕ ಸೇವಾಕಾರ್ಯಗಳನ್ನು ಮುಂದುವರಿಸುತ್ತಿದ್ದಾರೆ.

ಎರಡನೇಯ ದೇವಾಲಯವನ್ನು 1862 ರಲ್ಲಿ ಫಾ|| ರೆನಾಡಿನ್‌ ರವರು ನಿರ್ಮಿಸಿದರು.  ಅವರು ಈ ದೇವಾಲಯವನ್ನು ಪವಿತ್ರ ಶಿಲುಬೆಯ ಆಕಾರದಲ್ಲಿ ನಿರ್ಮಿಸಿದರು.  ಸೆಪ್ಟಂಬರ್‌ 16, 1862 ರಂದು ದೇವಾಲಯವನ್ನು ಉಧ್ಘಾಟಿಸಲಾಯಿತು.  ಅಂದಿನ ಧರ್ಮಾಧ್ಯಕ್ಷರಾದ ಬಿಷಪ್‌ ಚಾರ್ಬೊನಾಕ್ಸ್‌, MEP ಸಂಸ್ಥೆಯ 5 ಗುರುಗಳು ಮತ್ತು ಸುಮಾರು 300 ರಿಂದ 400 ಜನ ಸ್ಥಳೀಯ ಕ್ರೈಸ್ತರು ಈ ಉಧ್ಘಾಟನಾ ಸಮಾರಂಭದಲ್ಲಿ ಭಾಗವಹಿಸಿದ್ದರು.

ಮೂರನೇಯ ದೇವಾಲಯವನ್ನು ಫಾ|| ಸಿ. ಅಂತಪ್ಪರವರ ಕಾಲದಲ್ಲಿ ನಿರ್ಮಿಸಲಾಯಿತು.  ಫಾ|| ಸಿ. ಅಂತಪ್ಪರವರು ನಿರ್ಮಿಸಿದ ನೂತನ ದೇವಾಲಯವನ್ನು ಲೊಯೊಲದ ಸಂತ ಇಗ್ನಾಸಿಯವರಿಗೆ ಸಮರ್ಪಿಸಲಾಯಿತು.  ದೇವಾಲಯದ ಹೆಸರಿನ ಬದಲಾವಣೆಯ ಬಗ್ಗೆ ಯಾವುದೇ ರೀತಿಯ ದಾಖಲೆಗಳು, ಪತ್ರಗಳು ಅಥವಾ ವಿವರಗಳು ಲಭ್ಯವಿಲ್ಲ.  ಈ ಮೂರನೇಯ ದೇವಾಲಯದ ಅಡಿಪಾಯವನ್ನು ಮಾರ್ಚ್‌ 2, 1959 ರಂದು ಹಾಕಲಾಯಿತು ಮತ್ತು ಡಿಸೆಂಬರ್ 15, 1960 ರಂದು ಆಗಿನ ಮಹಾ ಧರ್ಮಾಧ್ಯಕ್ಷರಾಗಿದ್ದ ಬಿಷಪ್‌ ಥಾಮಸ್‌ ಪೊಥಕಮುರಿ ಅವರು ಉಧ್ಘಾಟಿಸಿದರು.

ನಾಲ್ಕನೇಯ ದೇವಾಲಯ ಬೇಗೂರು ವಿಚಾರಣೆಯ‍ ಭಕ್ತ ವಿಶ್ವಾಸಿಗಳ ಕನಸಾಗಿತ್ತು.  ವಿಚಾರಣೆ ಬೆಳೆದಂತೆ, ಭಕ್ತರ ಸಂಖ್ಯೆ ಹೆಚ್ಚಾಯಿತು, ದೇವಾಲಯ ಚಿಕ್ಕದಾಯಿತು.  ದೇವಾಲಯದಲ್ಲಿ ಸ್ಥಳದ ಕೊರತೆಯಿಂದಾಗಿ, ಭಕ್ತ ವಿಶ್ವಾಸಿಗಳು ಬಲಿಪೂಜೆಯಲ್ಲಿ ಭಾಗವಹಿಸಲು  ಕಷ್ಟವಾಗಲಾರಂಭಿಸಿತು.  ಬಲಿಪೂಜೆಗೆ ಬರುತ್ತಿದ್ದ ಭಕ್ತರಲ್ಲಿ ಹೆಚ್ಚಿನವರು ದೇವಾಲಯದ ಹೊರಗೇ ಉಳಿಯಬೇಕಾದ ಪರಿಸ್ಥಿತಿ ಉಂಟಾಯಿತು.  ವಿಚಾರಣೆಯ ಭಕ್ತರು 2000 ದ ಇಸವಿಯಿಂದ ಹೊಸ ದೇವಾಲಯಕ್ಕಾಗಿ ಪ್ರಾರ್ಥಿಸಲು ಪ್ರಾರಂಭಿಸಿದರು.  ಆಗಸ್ಟ್‌ 13, 2017 ರಂದು ಅಂದಿನ ಮಹಾ ಧರ್ಮಾಧ್ಯಕ್ಷರಾದ ಬಿಷಪ್‌ ಬರ್ನಾಡ್‌ ಮೊರಾಸ್‌ ರವರು ಹೊಸ ದೇವಾಲಯಕ್ಕೆ ಶಂಕುಸ್ಥಾಪನೆ ಮಾಡಿದರು.  ಅವರು ಅಡಿಗಲ್ಲು ಹಾಕಿದ ದಿನದಿಂದಲೇ ನೂತನ ದೇವಾಲಯ ಕಟ್ಟುವ ಕನಸು ನನಸಾಗುವುದೆಂಬ ಭರವಸೆ ಭಕ್ತಾದಿಗಳಲ್ಲಿ ಮೂಡಿತು.  ಅಂದಿನ ವಿಚಾರಣೆಯ ಗುರುಗಳಾಗಿದ್ದ ಫಾ|| ಸಹಾಯರಾಜ್‌ ನೂತನ ದೇವಾಲಯ ಕಟ್ಟುವ ಜವಾಬ್ಧಾರಿ ವಹಿಸಿಕೊಂಡರು.   ಫಾ|| ಸಹಾಯರಾಜ್‌  ರವರು ನೂತನ ದೇವಾಲಯದ ಕೆಲಸವನ್ನು ಪ್ರಾರಂಭಿಸಿದರಾದರೂ, ಅದು ಪೂರ್ಣಗೊಳ್ಳುವ ಮುನ್ನವೇ ಬೇರೆ ವಿಚಾರಣೆಗೆ ವರ್ಗಾವಣೆಯಾದರು.  ದೇವಾಲಯವನ್ನು ಕಟ್ಟಿ ಪೂರ್ಣಗೊಳಿಸುವ ಜವಾಬ್ಧಾರಿಯನ್ನು ತಮ್ಮ ನಂತರ ವಿಚಾರಣೆಯ ಅಧಿಕಾರ ವಹಿಸಿಕೊಂಡ ಫಾ|| ಆರೋಕಿಯಸ್ವಾಮಿ ಸೆಬಾಸ್ಟೀಯನ್‌ ರವರಿಗೆ ಹಸ್ತಾಂತರಿಸಿದರು.  ಫಾ|| ಆರೋಕಿಯಸ್ವಾಮಿ ಸೆಬಾಸ್ಟೀಯನ್‌ ರವರು ಆ ಕಾರ್ಯವನ್ನು ಪೂರ್ಣಗೊಳಿಸಿದರು.  ಭಾರತ ಮತ್ತು ನೇಪಾಳದ ಅಪೊಸ್ಟೋಲಿಕ್‌ ನುನ್ಸಿಯೊ (Apostolic Nuncio) ಆದ ಅತೀ ವಂದನೀಯ ಡಾ. ಲಿಯೋಪೋಲ್ಡೊ ಗಿರೆಲ್ಲಿ ರವರು,  ಬೆಂಗಳೂರಿನ ಮಹಾ ಧರ್ಮಾಧ್ಯಕ್ಷರಾದ ಪೀಟರ್‌ ಮಚಾಡೊ ಮತ್ತು ಗೌರವಾನ್ವಿತ ನಿವೃತ್ತ ಧರ್ಮಾಧ್ಯಕ್ಷರಾದ ಅತೀ ವಂದನೀಯ ಡಾ. ಬರ್ನಾಡ್‌ ಮೊರಾಸ್‌ ಮತ್ತು ವಿಚಾರಣೆಯ ಗುರುಗಳಾದ ಫಾ|| ಆರೋಕಿಯಸ್ವಾಮಿ ಸೆಬಾಸ್ಟೀಯನ್‌ ರವರ ನೇತೃತ್ವದಲ್ಲಿ ಏಪ್ರಿಲ್‌ 23, 2022 ರಂದು ನೂತನ ದೇವಾಲಯವನ್ನು ಉಧ್ಘಾಟಿಸಿದರು.  ಈ ಐತಿಹಾಸಿಕ ಘಟನೆಯನ್ನು ವೀಕ್ಷಿಸಲು ಸುಮಾರು 15000 ರಿಂದ 16000 ಭಕ್ತಾದಿಗಳು ಸೇರಿದ್ದರು.

ದೇವಾಲಯದ ಆವರಣದಲ್ಲಿ ಲೂರ್ದುಮಾತೆಗೆ ಅರ್ಪಿತವಾದ ಸುಂದರವಾದ ಗವಿ ಇದೆ.  “ಬೇಗೂರು ಲೂರ್ದುಮಾತೆಯ ಗವಿ” ಅಥವಾ “ಗ್ರೊಟ್ಟೊ ಆಫ್‌ ಅವರ್‌ ಲೇಡಿ ಆಫ್‌ ಲೂರ್ಡ್ಸ್‌” ಎಂದು ಕರೆಯಲ್ಪಡುವ ಈ ಗವಿಯು ಅನೇಕ ಅಧ್ಬುತಗಳಿಗೆ ಸಾಕ್ಷಿಯಾಗಿದೆ.   ಪರಿಶುದ್ದ ಕನ್ಯಾಮಾತೆಯ ಮಧ್ಯಸ್ಥಿಕೆಯಿಂದ ಪಡೆದುಕೊಂಡ ಎಲ್ಲ ವರಧಾನಗಳಿಗೆ ಕೃತಜ್ಞನತೆಯಾಗಿ ಬೇಗೂರಿನ ಜನತೆ ಈ ಗವಿಯನ್ನು ಕಟ್ಟಿರುತ್ತಾರೆ.  ಸುಮಾರು 1944 ರ ಮೊದಲು ಬೇಗೂರು ಗ್ರಾಮದಲ್ಲಿ ಕ್ಷಾಮ ಮತ್ತು ಬರಗಾಲವಿತ್ತು.  ಇದರ ಪರಿಣಾಮವಾಗಿ ಜನರು ಮಾರಕವಾದ ರೋಗಕ್ಕೆ ಬಲಿಯಾಗಿ ಸಾಯುತ್ತಿದ್ದರು,  ಸತ್ತವರ ಸಂಖ್ಯೆ ಹೆಚ್ಚಾಗಿತ್ತು.  ಈ ಸಮಸ್ಯೆಗೆ ಪರಿಹಾರ ಕಾಣದೆ, ಸರಿಯಾದ ಚಿಕಿತ್ಸೆ ಇಲ್ಲದೆ, ಅಸಹಾಯಕರಾಗಿದ್ದ ಇಡೀ ಗ್ರಾಮದ ಜನರು ಮಾತೆ ಮೇರಿಯಲ್ಲಿ ಪ್ರಾರ್ಥಿಸಿದರು, ತಮ್ಮ ಜೀವವನ್ನು ಉಳಿಸಬೇಕೆಂದು ಬೇಡಿಕೊಂಡರು.  ಮಾತೆ ಮೇರಿ ಅವರ ಪ್ರಾರ್ಥನೆಯನ್ನು ಆಲಿಸಿ, ಅವರ ಕೋರಿಕೆಯನ್ನು ನೆರವೇರಿಸಿದರು.  ಜನರ ಜೀವನ ಸುಧಾರಿಸಿತು, ಮಾರಕ ರೋಗ ಮಾಯವಾಯಿತು.  ಜನರು ತಮ್ಮ ಪ್ರೀತಿಯ ಸಂಕೇತವಾಗಿ ಮತ್ತು ಮಾತೆ ಮೇರಿಗೆ ಕೃತಜ್ಞತೆಯಾಗಿ ಈ ಗವಿಯನ್ನು ಕಟ್ಟಿ, ಆಗಸ್ಟ್‌ 1, 1944 ರಂದು  ಫಾ|| ಆರ್.‌ ಪಿ. ಜೆ. ಗ್ರೆಟಿಯನ್‌ (R.P.J. Gratian) ಉಧ್ಘಾಟಿಸಿದರು. ಜನರು ಪ್ರತೀ ವರ್ಷ ಲೂರ್ದುಮಾತೆಯ ಗವಿ ಹಬ್ಬವನ್ನು ಆಚರಿಸುವುದಾಗಿ ಭರವಸೆನೀಡಿದರು.  ಅದರಂತೆಯೇ ಅಂದಿನಿಂದ ಪ್ರತೀ ವರ್ಷವೂ ಲೂರ್ದುಮಾತೆಯ ಗವಿ ಹಬ್ಬವನ್ನು ಆಚರಿಸುತ್ತಾ ಬಂದಿರುತ್ತಾರೆ.  ಪ್ರತೀ ವರ್ಷವೂ ಎಲ್ಲಾ ಧರ್ಮದ ಜನರು ಈ ಹಬ್ಬದಲ್ಲಿ ಪಾಲ್ಗೊಳ್ಳುತ್ತಾರೆ.  ಅನೇಕ ಜನರು ತಮ್ಮ ಕೋರಿಕೆಗಳು ನೆರವೇರಿದಾಗ, ತಮ್ಮ ಪ್ರರ್ಥನೆಗೆ ಉತ್ತರ ಸಿಕ್ಕಾಗ ದೇವಾಲಯದಲ್ಲಿ ಸಾಕ್ಷಿ ನೀಡುತ್ತಾರೆ.  ಉರಿಯುವ ಮೇಣದ ಬತ್ತಿಗಳನ್ನು ಕೈಯಲಿ ಹಿಡಿದು ಬೇಡಿಕೊಂಡರೆ, ಮಾತೆ ಮೇರಿ ನಮ್ಮ ಪ್ರಾರ್ಥನೆಗಳಿಗೆ ಉತ್ತರ ನೀಡುತ್ತಾರೆಂಬ ಬಲವಾದ ನಂಬಿಕೆ ಮತ್ತು ವಿಶ್ವಾಸ ಜನರಲ್ಲಿದೆ.